劉金寶喺03年5月調返北京，市場聞到唔妥味道，但中銀（2388）就喺呢個時候開始騰飛，由8元（招股價8.07元）喺兩個月內升上10元，再過兩個月升上16元。上周五，劉金寶判刑，呢日中銀創16.55元新高，上周五推介嘅中銀C輪3641有好表現，單日升幅12%。
滙控C輪3843：市場錢多，中銀買家，注碼1日一擲就係10億銀，滙控（005）129.20元，距52周高位136.50元重有唔少水位。中銀掂，滙控唔會唔掂，搵吓邊隻滙控C輪會跑快啲。
滙控C輪明年1月份夠鐘嘅有9隻，成交金額最大嘅係4906與3843，就將2輪比較一下。3843壽命短3個交易日，街貨較多，除此之外，由行使價到溢價、槓桿率，引伸波幅，無一不靚過4906。
假如3843溢價與4906相同，則值0.58元，即現價0.50元大大「低水」8仙或14%。揸4906而沽出改買3843，幾乎絕對有着數。再加埋正股帶動，揸3843有權賺到笑。
滙控C輪9027：滙控C輪明年5月夠鐘者有9027、3404與4963，成交金額最大嘅係9027，上周收61仙，結合壽命、數據，最抵買嘅就係9027。
章盛