雖然在泰興（389）事件後，好多芬佬對工業股都好有戒心，但對個別正斗大型工業股就作別論，好似電鑽股創科實業（669）咁，股價至今仍硬淨，就算早排人民幣升值，股價一度跌落18元邊，但好快就彈番上嚟。
創科將於本周四公布中期業績，市場預期盈利增長超過5成，所以家陣雖然成二十幾倍PE，但股價仍有上升空間。
證券界睇好創科盈利上升，主要係因為去年收購Milwaukee帶來盈利貢獻。相對其他工業股，創科其實算有計，一般工業股，就算大隻如德昌電機（179），近年受原材料如銅價等大幅上漲影響盈利，但創科有本事不斷發展新產品，所以能夠將成本轉嫁畀客戶。
創科上周五跌1.7％，收19.45元，成交股數126萬股，金額2462萬元。
另外，由於大陸網絡股近期在花旗熱炒，本地的騰訊（700）上周五亦發難，大升12.21％，收7.35元，其餘如TOM集團（2383）同埋中華網（8006）等亦見受追捧，但偏偏揸住好多新浪股份的四通控股（409）升唔夠2%，睇落唔多合理。
慕容小初