賓架陳因出出入入冷氣間與室外，患上傷風病，去搵老友醫生Ｃ睇症。醫生Ｃ見老友嚟到，猛講中國山水畫，講到賓架陳一頭霧水，最後先至知道，醫生Ｃ十幾年前去大陸旅行，買咗一批字畫，其中兩幅係張大千，索價每幅六萬元。二十年來醫生Ｃ每去大陸，都會買一啲字畫，成堆擺晒響屋企書房一個大箱內，根本冇乜時間拎出嚟欣賞。
十年前，佢諗住將兩幅張大千畫賣出去，訂價十五萬，點知無人問津。九年前，佢去某拍賣行登記拍賣，後來又收番，但係拍賣行就將兩幅張大千畫拍照，放入「候賣名冊」內。轉眼到咗二○○五年，醫生Ｃ半個月前突然收到電話，問佢肯唔肯賣，醫生Ｃ於是拎一幅去試吓。一試就過癮咯，醫生Ｃ對賓架陳講：「我唔知睇幾多個症先至可以收到百幾萬！一幅畫就值咁多，你話做醫生有乜嘢好吖！」
前幾日會考放榜，十五個十優尖子之中，十一個話要入大學讀醫科，蔡堅醫生勸告：「望發達嘅就唔好讀醫科！」啱嘅，醫生Ｃ話：「當年買多幾幅張大千就發達咯！」現在大陸有好多富豪，手頭現金太多，想買多啲資產，中國商人有附庸風雅嘅傳統，發大達就想沾染文化色彩，有乜好得過買中國名畫家嘅真跡，掛在廳堂，好威啫。
醫生Ｃ平時有留意國際畫壇，知道中國畫係中國人先至有興趣，西方收藏家、artdealers唔多理會，但最近國際掀起一片中國熱，中海油、海爾、百度、阿里巴巴……上晒國際報紙財經版，連CNBC節目主持人都話：NowitseemsallroadsleadtoChina（條條大路通中國），故此醫生Ｃ注意到，猶太人已經開始留意中國畫買賣，一旦佢哋決定入市，張大千、趙無極等人嘅畫作，就更加價值不菲。