《經濟日報》唔覺唔覺已經上市個幾禮拜,股價一直企穩,上禮拜五收市報兩個兩毫半,原始股東用個七認購進帳可觀,真係值得慶祝吓。
八方聽聞馮老闆準備今個禮拜六喺金鐘搞個慶功宴,請班夥計一齊食番餐,以慶賀上市成功,亦多謝咁多手足多年辛勞,令《經濟日報》成為市值近十億嘅集團。三大股東揸住六成幾,印印腳可也。
而呢個慶功宴,更歡迎攜眷參加,不過個「眷」要科款。初初話每位二百五,後來可能有啲噪音,最新消息係配偶免費。
但有夥計就問:咁如果帶個仔嚟,使唔使畀錢呢?咁又有道理,但亦難處理,佢哋有一千零四十九人,如果一人帶一個,條數好襟計。從正面睇,管理層咁知慳識儉,照計一定會保護股東利益,小股東可以放心噃。
爆料熱線:29290000、27860099
報料傳真:26239278
報料電郵:[email protected]