中銀香港前總裁劉金寶被判死刑，雖然有得緩刑，但呢世人有冇機會踏出牢獄都好難講。呢個消息喺銀行界有頗大迴響。非中銀系統嘅賓卡多抱同情態度，認為就算真係貪七百幾萬，都唔使死吖。佢哋普遍覺得劉金寶係開明派，而且能幹。不過中銀系統嘅人就唔係全部咁睇，事關劉主催十行合併，又裁員又拆招牌，得罪好多人，大把人唔撐佢。
八方同劉金寶有數面之緣，最深印象係佢來港只有幾年，廣東話竟然講得相當好，呢種方言好難學，證明佢有過人之處。上禮拜五知道佢判刑消息，摷吓荷包，有張中銀發行嘅一千蚊，上面有劉金寶三個字（圖）。在流通貨幣上簽名，而竟然判死刑，一定係香港紀錄。側聞中銀方面近來已經不斷更換呢批「有污名」嘅銀紙，回收之後發過啲由和廣北簽名嘅，所以喜歡收集銀紙嘅讀者，要快啲手啦。
爆料熱線：29290000、27860099
報料傳真：26239278
報料電郵：[email protected]