人怕出名豬怕肥，一啲都冇講錯。小小超李澤楷旗下嘅電訊盈科，早輪收購SUNDAY，本來係好事，但係唔知點解喺嗰陣時，小小超透過私人公司增持電盈股份，搞到人哋以為佢內幕交易，傳佢被人查，單嘢俾FT《金融時報》知道，寫咗出嚟，令佢好唔高興。
為正視聽，電盈主動向證監會了解，結果證監會法規執行部董事李顯能發出書面通知，話證監會冇展開對電盈主席李澤楷或任何其他與電盈有聯繫人士，被指涉及電盈股份內幕交易嘅調查，否定咗傳聞。證監呢種澄清過去非常罕見，唔知日後其他上市公司有類似傳聞，佢哋會唔會咁做？如果會，就係市場同小投資者之福喇。
電盈收到信後，為免俾人再誤會，又重申小小超同公司都冇收到證監會關於此事嘅任何正式或非正式查詢。八方都覺得佢唔會做啲咁嘅嘢，但為免人誤會，睇怕小小超買賣自己公司股票都應該小心啲。
爆料熱線：29290000、27860099
報料傳真：26239278
報料電郵：[email protected]