愛國人士兼八方同行程翔被北京指佢做間諜，收咗台灣數以百萬元嘅酬金，為敵營提供情報。呢單案，官方一味指控程翔犯法，但係佢喺香港嘅一班老同學、老朋友以及妻子都話無法置信，覺得程翔被屈；咁我哋偉大祖國嘅國安同公安部門點會有錯，捉得你梗係證據確鑿，香港人唔信，於是就以其他手法令大家改變對程老兄嘅睇法。
做間諜一係為錢，一係為女人，於是喺未定罪之前，上至特區政府下至各大黨派都收到風，話單案唔係咁簡單，重涉及男女感情問題。吓？又係呢一味嘢，唔通何偉途事件食過翻尋味，八方聽完當然一笑置之，不過，你唔信總有人信，何況放料嘅係中方權威人士。
「情婦」出現一箭多鵰
於是出現咗一個叫做黃偉嘅「情婦」，呢一着可謂一箭多鵰，一方面打擊程翔太太劉敏儀；一方面又打擊如曾鈺成、蔡素玉等港大愛國同學，等大家知道程翔貪錢有原因，唔好咁多嘢講。
黃偉一出，以為劇情都差唔多，豈料峯迴路轉，第二日黃女士竟然由深圳自由行嚟咗香港，接受記者訪問，親口否認係程翔情婦，重大鬧啲有意抹黑嘅報道胡說八道，無中生有。嘩！呢個安排都算絕！台灣佬死都唔出聲，有人重話台北同北京已私下互有招呼；民主陣營雖然同情程兄，但係愛莫能助；最後就剩番班同程翔一齊成長嘅國粹派，一片丹心，如此下場，佢哋真係有啲兔死狐悲嘅感覺。
曾鈺成都講到好白，話希望當局發放多啲資料，以正視聽，又話希望當局從寬處理。八方聽聞，北京雖然一早做晒工夫，但仍然關注香港親中陣營嘅反彈，今日郁得程翔，第日都郁得佢哋，愛國都係咁話。
目前要睇大家識唔識做，中聯辦王如登噚日當住曾鈺成面講要依法辦事，程翔係記者都冇得例外，真係「公正」，聽呢啲人講「法治」，哈哈哈！不過，八方有位老友就認為唔應該容忍有人誹謗抹黑，但同老共交手，大家道理標準唔同，真係唔知點拗；然後佢又講笑話，希望呢位黃女士係真嘅，唔係假嘅。吓！唔會再有乜嘢驚人發展啩。
爆料熱線：29290000、27860099
報料傳真：26239278
報料電郵：[email protected]