東尼．渣為《冬蔭功》做宣傳時，口口聲聲強調今次嘅賣點係一套「象拳」，對號入座地以為一定係瞄準成龍條舊路照行一次，當年成龍以一齣《蛇形刁手》技驚四座，今天東尼．渣便施展一套「象拳怪招」照辦煮碗，怎知入場一看，完全不是那回事。
「象拳」只是花招，《冬蔭功》認認真真地講述泰國人跟大象的感情，看得出台前幕後都是真的愛大象，大象的「戲」尤其精采，小象依偎着彌留的大象媽媽的那場戲，看得幾乎掉眼淚。
貨真價實是一齣動作連場，純官能刺激的娛樂片，相比《拳霸》，《冬蔭功》的製作大得多，加入了不少成龍式或荷李活式的大型動感爆破場面，刺激緊張，跟成龍式動作電影最大的分別是《冬蔭功》較成人，下下都打到人斷手斷腳，不似成龍努力將電影做到老幼咸宜，在外國的出租電影店，成龍的電影經常被放置在合家歡專櫃。
東尼．渣弗到漏油，跳到老年咁高踢爆街燈，再一個鏡頭直落由樓下打到上四樓，一個人打幾十人，又踭又膝又起勢咁掉人落樓，將體能發揮得淋漓盡致。然而，有了膽正的男主角，也必須要有一群命平的拼搏武師手足，確實有幾個鏡頭睇到心都寒埋，肉都赤埋，四樓俾人掉落街，稍為掉過少少條命仔就凍過水。
每一位動作巨星的誕生都需要一群無名英雄在背後默默付出，看了《冬蔭功》就會明白。