趙薇𠵱家重喺珠海拍緊劇集《TRACK極速戀愛》（暫名），不過因為呢幾日當地打緊風，天氣唔穩定，所以要取消部份拍攝工作，前晚趙薇趁住空檔同拍檔陸毅及劇組工作人員一齊歎海鮮，十幾人包房食飯，埋單大概一千五百蚊人民幣，認真抵食。
前晚七點幾，薄施脂粉嘅趙薇着住T恤牛仔褲，同劇組一齊離開下榻嘅酒店，一行十幾人浩浩蕩蕩坐三部車出發。
坐寶馬出動
趙薇坐住一架掛有香港車牌嘅寶馬房車，隨隊直駛距離酒店約二十分鐘車程嘅新海利海鮮美食廣場，食肆門外陳列咗好多生猛海鮮，睇到馮仁昭食指大動。
趙薇入咗美食廣場後即被安排坐喺貴賓房，事後馮仁昭聽啲啤酒小姐講，話趙薇成班人叫咗魚、蝦、蟹等海鮮，又叫咗半打啤酒，但趙薇就冇飲。佢哋呢餐飯擦咗足足兩粒幾鐘，一行人之後就返酒店休息。
