雖然噚日落傾盆大雨，但工商及科技局局長曾俊華出席世貿「香港部長級會議」傳媒工作坊時，就心情靚靚，重露兩手幽默。曾局長講完簡報後，主持人建議鬍鬚曾不如行落台，近距離接受現場提問，局長果然轉數快，即刻接口話：「點樣落台都要練習吓」，結果佢亦順應要求，坐喺台邊同大家對話。
全球貿易保護主義抬頭，世貿會議要達成「香港宣言」，係咪困難重重？鬍鬚曾話，貿易問題從來都存在，「想冇貿易問題，只要冇貿易就冇問題」，用「阿媽係女人」呢啲永遠都啱嘅答案回應，不愧係政務官出身。鬍鬚曾話，呢四個月已經參加咗六個世貿會議，由東京到巴黎，韓國濟州島同瑞士日內瓦，以至非洲肯亞同贊比亞。佢話呢啲都係旅遊勝地，但可惜冇時間參觀名勝，對呢啲地方嘅印象只係機場、酒店同會議廳咁話。但係由𠵱家到十二月會更加忙碌，九月初去巴基斯坦參加發展中國家G20非正式部長會議，十月又要走訪歐美、亞洲同非洲國家，真係忙到氹氹轉。
爆料熱線：29290000、27860099
報料傳真：26239278
報料電郵：[email protected]