和記行（720）往績PE72倍，估佢05年度（12月止）PE將會戲劇性減到得番一兩倍，破位在即，快炒。和記行原本有一筆欠負三菱重工貸款1.33億銀，02年最初貸款協議，貸款期15年，2.5厘貸款利息每年年底清數，貸款本金部份，由2012年開始攤還。今年3月，雙方再訂立還款協議，和記行會支付4680萬銀，其餘尾數8950萬銀一筆勾銷。
即係話，和記行長債斷尾之餘，變相賺咗8950萬銀，就當打8折入帳，和記行05年度PE，一次過跌到得番1.9倍。再講，呢期香港經濟大反彈，多咗有銀之士，和記行本業分銷法拉利及瑪莎拉蒂汽車及零件業務，又有唔錯表現，04年度虧轉盈，倒賺千萬，照計呢瓣業務，今年繼續好景。
和記行NAV約莫0.12元，現價（5.8仙）折讓52%，重未炒過籠，又隻股經上星期五抽升，已經貼近3年橫行頂6仙水位，一突破，應該有一輪衝刺，擺定止蝕，可以快炒。
南海食正高油價concept
南海石油（076）最近10個交易日，球來球往，三四線呢期靜到甩轆，南海咁活躍，係異數，此無他，皆因呢期油價狂飆，南海食正concept。又呢期龍頭中石油（857）狂升，股價相對NAV達3倍水位，中油香港（135）追落後，去到兩倍水位，至於南海，現價0.43元同NAV0.4元差無幾。但要咁睇，三隻股實力懸殊，況且，南海重係高PE一族（21倍），要佢追貼龍頭股嘅資產溢價倍數，暫時癡心妄想。反而趁油價重高企，食住concept，吼實隻股，見低於NAV0.4元入市，NAV樓上15%套利，以呢個波幅水位衡量，短炒重實際。
錢雋