外號金刀梁嘅梁智鴻醫生，退下火線唔選立法會後，被老董委任做醫管局主席，沙士後佢毅然辭職以示負責，但佢係有料之人，煲呔上場後掃走民建聯譚耀宗，搵佢接掌安老事務委員會，八月一號起金刀梁就坐正做主席。佢強調上場後唔係要拎起把刀「cut、cut、cut」，反而希望當局增加資源，令安老工作做得更好。
梁醫生話，上任後會同各長者服務機構打招呼，包括參觀房協「長者安居樂」計劃嘅樂頤居，八方話呢個計劃構思唔錯，可惜要有番咁上下身家先有資格入住，若然入場費相宜啲，相信會更受歡迎，梁醫生似乎深感認同，話有機會會研究吓呢個問題。
梁醫生又同八方大讚譚耀宗係有心人，可惜政府缺財，令安老會工作舉步維艱。佢稍後會同衞福局局長周一嶽傾傾，睇吓有乜辦法攞多啲「筆直」。對於佢又全身投入公職，金刀梁笑言最大意見係老婆大人，因為從政多年，應診收入有限，要靠老婆先養得起頭家，佢辭職後老婆以為有老公養，點知佢又做另一份公職，老婆要繼續揹起頭家。
爆料熱線：29290000、27860099
報料傳真：26239278
報料電郵：[email protected]