講起布斯韋利士，大家一定會諗起《鬼眼》！不過，呢套戲已經係6年前嘅作品，呢段時間入面，日漸發福嘅「肥布」雖然拍過《不死劫》、《罪惡城》等電影，但聲勢已大不如前，直至演出《虎膽狙擊》，其事業似乎再有起色！與《虎膽龍威》系列最大不同處，是今次布斯唔再扮Rambo單人匹馬衝鋒陷陣；成功救人，純粹靠把口！打打殺殺嘅場面，今集由血腥暴戾嘅馬素揹重飛！布斯點樣靠把口就收拾恐怖分子？買張DVD睇吓咪知囉！
記者：陳國輝
Profile
片名：《虎膽狙擊》
發行：得利
導演：佛羅倫沙利
主演：布斯韋利士、奇雲波勒、雷瑪韋利士
片長：113分鐘
級別：IIB
售價：$100
故事由英雄末路開始，前洛杉磯談判專家謝夫泰利（布飾）因目擊人質慘死而自責，離開妻女獨居鄉郊小鎮，當個平凡警長想淡忘創傷。後來，因為三名少年潛入豪宅偷車，並挾持屋內一家，令謝夫再次捲入一宗談判任務；但更意外嘅係，事件重引發恐怖分子參一手，謝夫妻女在背後受挾持，面對世上最困難嘅「雙重談判」，面對自己嘅心理恐懼，謝夫可能要犧牲其中一方。
大人細路都講數
以「談判」為題材嘅劇情真係唔多，記得無綫曾播出一套電視劇《談判專家》，由歐陽震華及張智霖主演，故事節奏頗為緊湊；至於呢套同樣玩談判嘅《虎膽狙擊》，雖然全片僅113分鐘，但係「講數位」多不勝數！具10年探員及7年談判專家經驗嘅泰利，「講數」時無所不用其極，包括跪地哀求、開槍威脅，招招出盡；甚至不惜用自己身體作餌，去換取人質性命亦在所不惜。但係懂得「數講」嘅人，又豈止泰利呢？就連被挾持嘅小朋友都會用槍指嚇兇徒講數，總算係劇情笑位之一！
刀插頭「不死身」
警匪槍戰片入面，通常會出現類似《英雄本色》嘅人物，即係全身子彈窿都死唔去嘅「不死身」戰士，就好似當年「Mark哥」咁！呢套片入面嘅馬素，可謂表現得更誇張、更加變態！佢有一種癖好，就係特別鍾意睇當人死去前嘅樣；每次殺人，都要近距離對準頭部及心臟先開槍，方佢唔死咁，手法極之兇殘！而更可怕嘅係，佢身體重好似刀槍不入一樣，面對恐怖分子嘅時候，唔單止中咗槍都冇事，就連刀仔插頭亦死唔去，夠晒核突！
真．談判專家教路
《虎》片裏面，恐怖分子為咗搵番隻有機密文件嘅DVD碟，又唔想俾人認出個樣，於是經常以唔同身份出現，一時用黑布包住塊面，一時又扮成FBI同泰利見面，唔講重以為佢鍾意玩Cosplay㖭！而劇情最抵死部份，係當恐怖分子扮成FBI及出動裝甲車嗰陣，居然瞞騙晒所有警察，然後輕易混入大屋，逐處搜查DVD嘅下落，講起嚟似乎得啖笑！至於Bonus部份都算幾精采，除咗有額外劇情以及刪剪過嘅片段，重有真正談判專家為演員教戲，呢啲珍貴資料，只有DVD版先有咋！
