別人眼中，校長與曾志偉等一班朋友交談時，總是互相取笑，口不擇言，就如訪問當天，巧遇老朋友黃百鳴，校長笑他有老花，最後留下自己的聯絡電話給黃百鳴時，還笑說：「我實會打畀你，睇吓你重喺唔喺度嘛！」
常做和事老
校長入行早期認識的朋友，可以算是最知心的一群，他說：「阿叻（陳百祥）有句說話成日掛喺口邊，佢話十六歲前嘅人冇機心，所以喺呢段時間前識嘅朋友會係真正嘅朋友，大家都唔會有利害衝突。志偉、阿叻、徐克、施南生、溫拿同新藝城班人，都係最好朋友。」
校長續說：「最記得以前七、八個人去麥嘉屋企開會，佢有間奮鬥房，門口真係有張紙貼住『奮鬥房』㗎！每次開會志偉就最大貢獻，佢係咁瞓覺，佢嘅鼻鼾聲就同我哋打氣。好多人話樂隊咁多人，所以最難相處，每個人都有自己意見，但我哋溫拿就好民主，一遇到意見分歧，就會坐低開會，舉手投票囉！我哋五個人實出到單數。我通常做和事老一個，因為我意見最多，又最八卦，而且我又冇乜所謂，總之大家唔會鬧交或者唔睬。」