全因香港獲得2008年奧運馬術項目的主辦權，令到學騎馬的人激增一倍多。雖然賽事在3年後才舉行，一班小蘋果親身走入馬廐，甘願替馬匹沖涼洗身兼餵紅蘿蔔，都是為了想騎馬。
記者：圓碌碌
攝影：瘦蜢蜢
第一站：餵馬
想騎馬，必先要討好馬大哥大姐，否則牠們怎肯乖乖讓你騎呢？所以醒目的小蘋果事先準備了紅蘿蔔餵馬，馬仔飽飽，自然有力跑。
原條食
拿着紅蘿蔔尾部，當馬咬紅蘿蔔時，即刻放手。
切粒食
攤平隻手放紅蘿蔔在掌心，等隻馬可以用脷舔，不過代價是成手都係馬口水。
馬可以食乜？
紅蘿蔔、乾草，亦可以餵薄荷糖，不過教練並不喜歡大家餵糖畀馬食，因為馬跟人一樣，食得糖多會爛牙，而馬要補牙，要$1,500一隻，好貴呀！
親親小馬
喂！使唔使咁肉緊攬實我呀，搞到我眼都凸埋。
點解馬身上有紋身？
馬身的英文字是牠未改名前的識別編號，右邊膊頭是由牠們出生的牧場所刻，左邊膊頭是抵港時刻。刻的方法是將字母模套在身上，敷乾冰，令該部份皮膚枯死。
