徐小鳳噚晚喺紅館舉行演唱會，特首曾蔭權同太太，以及張敏儀同政府一班高官都有嚟捧場。原來，小鳳姐將噚晚演唱會收益撥捐一百萬畀「世代無肝炎」，雖然支票頒贈儀式時特首冇上台，但身為「程思遠（中國．國際）肝炎研究基金會」贊助人嘅佢，都親自到場表示支持。
噚日特首去紅館睇騷，有成十幾個保安護駕，佢哋將紅館玻璃門門口附近範圍封閉，禁止閒雜人等走嚟走去，真係好大陣仗，點知啲市民完全冇理會勸喻，一於照行可也！大概八點十分左右，特首同佢太太抵達紅館，現場氣氛即時變得好緊張，雖然十幾個保安圍成人牆護駕，但有市民依然成功同特首握手。開騷之後，紅館司儀介紹特首嚟捧場時，曾特首即刻起身同市民揮手，盡顯佢親民嘅一面。
傳真︰2623-9278
電郵︰[email protected]
