出海玩浮潛，天氣係點？唔重要！目的地喺邊？無所謂！今次出海，最緊要係帶多幾套靚衫！搶眼三點式、輕柔沙龍固然要，但晚黑食私房菜着嘅性感衣裝，亦一定唔少得。多多架生，全因為活動講究安全，不論係行沙灘定潛落水，都會安排一男配一女，方便照顧！至於邊個係你嘅Partner？就睇你抽到嘅顏色手帶係咩色水！
記者：李玉蘭
攝影：周旭文
Models：Angus（Salvador）、Hidi、Mac
去到集合地點，一班早到嘅參加者已經講得興起。人群中，有中學畢業生、大學講師、I.T.人……響未昅清楚全部參加者時，Host攞出一個小袋，裏面裝滿顏色手帶，抽到同色手帶嘅男女就自自然然配成一對，預備開始上船！哈，又幾蹺，上船時啱啱好大浪，男士都順理成章，好有風度咁拖Partner上船。可能係大家都熱愛戶外活動，所以都有唔少共同話題，好快就傾得好投契，重講到單身呢個問題。男仔嘅口齒點都係差啲，好快就俾人「起」出「啱啱分咗手」、「有幾個女朋友」嘅底牌。
詐詐諦 水底獨對
當遊艇停響西貢一個超寧靜小灘時，大家竟然唔係第一時間跳落水，而係火速扮靚。女嘅就例牌兩件頭兼補補裝，男嘅就怕醜啲，多數都係着晒時款滑水褲。着咁靚為乜？就係為咗又要抽色帶時，畀個好印象新Partner。可能係響船上時，大家講男女經講得太高興，所以換Partner後，識潛水嘅就好熟絡咁互相幫對方孭氣樽，識游水嘅就手拖手玩浮潛，不過有人就誇張咗少少，明明係潛水高手就扮唔熟水性，要女伴教游水囉！
汽水槍 射得興起
係咁你拖吓我，我拖吓你，大家就響豔陽底下，㷫烚烚咁玩咗大半日，都係時間搭船食飯。上遊艇第一個動作係再抽手帶同食小食；好想當然咁以為新Partner會好有風度咁攞水果、汽水畀同伴，誰不知大家都好貪玩，竟然將汽水入落水槍、將水果當飛碟，係咁掟嚟掟去、射嚟射去！咁樣玩法，實在好鬼嘥嘢，但睇見佢哋寧願捱口渴都在所不計，惟有戥佢哋玩得開心。
無糖有機私房菜 勁冧
玩到幾污糟都無所謂，去到私房菜館，都有足夠時間畀你扮靚靚再出場；因為店主Samuel同Katy兩夫婦都係潛水發燒友，好明白出完海玩咗一日胃口會有幾咁大而呆滯，所以會見齊人至開始響露天開爐，將落田摘返嚟嘅有機果蔬，唔加味精、唔用糖，去炮製原汁原味嘅餸菜。
今次講明係單身派對，所以曾經響法國、中國、泰國等多個地方做大廚嘅Samuel好有計，做出款款心形或花形餸菜！搞笑嘅係，當佢將一碟碟2人餐上枱時，竟然有人建議唔玩2人世界，要全場人一齊食！睇嚟，目的都係把握機會昅清楚大家。何解咁心急？因為節目最後一個環節，就係各人可以響飛碟上留言，不論係想飛你或想Date你，都可以擲畀心目中對象，唔心急就假！
甜蜜的心
法國前菜用粟米芯、蟹柳加牛油煮成，入口清甜，但賣相就更得。
香口脆
中菜唔只Sell心形，一口咬落用黃豆搓成嘅小花杯，內裏係炸得香口惹味嘅牛肉，Yummy！
甜蜜脆卜卜
「渾身」都係洋葱、青椒、茄汁精華嘅炒雞球，甜甜酸酸又青爽，最啱癲咗一日嘅呆滯胃口。
跟團去
DiveandWine.com（22722788）
收費：遊船河連海鮮午餐$320，浮潛加$70，玩潛水每次加$200，食私房菜連酒水$320。
活動：水上活動主題次次不同，8月14日及28日為甕缸灣、白臘仔珊瑚體驗潛水之旅。
網址：www.diveandwine.com
美味館（63076669）
8道菜晚餐收費：基本餐每位$200，海鮮餐每位$300
地址：西貢北港
備註：須預訂
