香港防癌會創會主席何鴻超兩日前病逝，享年八十九。何鴻超係醫學界老前輩，對癌病研究同治療貢獻良多，尤其精於治療鼻咽癌，享譽國際。專為照顧癌病患者而設嘅南朗醫院，就係由何鴻超親手策劃嘅醫院。何教授喺下星期二設靈，星期三喺聖若瑟堂舉行安所彌撒。
另外，行政會議成員周梁淑怡嘅家姑金畹香亦已仙遊，周老太享年九十三。八方噚日亦留意到一則另類訃聞，一班仔女同家屬登廣告懷念剛剛去世嘅爸爸，內文提到，名叫「永堅」嘅慈父五十幾年前嚟到香港，白手興家，由流動小販做到牛丸舖，重自創「波子牛丸」，馳名街坊街里。
傳真︰2623-9278
電郵︰[email protected]