世貿部長級會議提唔提升到香港國際形象，為香港帶嚟成億進帳，真係要十二月之後先知，但八方可以肯定，今次會議十分大陣仗，淨係本地同海外傳媒記者都有成三千幾人。新聞處處長蔡瑩璧阿Yvonne噚日特登搞咗個咖喱餐飯局，同本地行家講吓世貿會議嘅安排。
到時個會包起晒會展新、舊翼，嗰度一帶都係封鎖區，淨係獲認證嘅記者同與會者有得入，但記者除咗採訪喺新翼舉行嘅開幕禮外，其餘時間只可以喺舊翼活動，而且六樓會闢為談判室，記者唔可以去，至於開幕禮、閉幕禮同工商及科技局局長曾俊華有份主持嘅閉幕記者會，都會透過衞星作全球播放。新聞處重話，世貿會議通常愈近尾聲愈係高潮，因為大家都想知道會議可唔可以達成協議，會期最後幾日與會者直頭喺會場度瞓㖭。
傳真︰2623-9278
電郵︰[email protected]