恒指全日高低波幅83點，6成時間係負數，4成時間係正數，埋單有5點輕微進帳，期指則升66點，計落低水19點。滙控（005）與恒生（011）遲吓除息，將拖低恒指46點，所以期指實際高水27點，代表睇好大市者仍多。
駿威C輪4622：駿威（203）由先幾日嘅3.225元散到前日嘅2.85元，昨日升番3格，收2.95元，做咗第2大升幅恒指成份股。但並唔係所有C輪都升，有隻4622，仍然由1.7仙跌到1.6仙，叫做跌6%。
4622係非標準輪，即有個X嗰隻，11月夠鐘，實際數據好難計，睇報價機當然睇唔到乜數據，上網睇又唔掂。先一排由3仙炒上7仙以上，幾日間大散近8成，唔明解重每日有人掟數十萬銀落去數據唔易計嘅窩輪。
隻輪去年10月以每份25.5仙發行，當時正股2.70元，𠵱家叫做冇跌到，但隻輪則進入深切治療部。
輪商，以後咪再發啲X輪。炒家，見到有X嘅窩輪，當作透明可也。
要揀駿威C輪落手，4837係正路之選。
思捷C輪3944：恒指成份股升幅最大嘅係思捷（330），收62.15元，升2.90元或4.9%，創出新高，6月中因歐元大散，思捷落到49.60元，唔覺唔覺，低位彈番25%。掟到50元以下嘅係芬佬，捧上60元以上又係芬佬，芬佬做嘢手法，真係冇法子估也。
思捷C輪，隻隻生猛，升幅由23%至45%。揀對象，3944條件最優，只不過壽命有限，9月下旬夠鐘。正股驚住價高有調整機會，都係唔沾手為上。
章盛