以前本欄好似講過，以色列情報機關Mossad係夏季沙灘消閒小說（通常係間諜、奇情、女色、暗殺、貪污共冶一爐嘅刺激寫作）經常談及、視之為天下無敵、叻過CIA嘅機構。根據其中一本小說所講，Mossad認為人類，無論男人女人、乜嘢年紀，都一定有一項弱點，特務要搵出呢項弱點並利用之嚟收集情報。通常成年男人有幾個死穴，就係男人、女人、銀紙、賭博、嗜好成癖……等等，俾特務乘虛而入。譬如小說內一個女配角，唔拍拖（冇男人）、唔搞同性戀（冇女人）、廉潔（唔貪錢）、不吸煙、不飲酒、不貪慕虛榮、不崇拜名牌，以色列特務冇晒佢符，搵唔到佢嘅弱點噃，點埋手呢？最後吼女配角去咗返工，特務潛入屋內，發覺佢收藏好多莫扎特唱片、莫扎特歌劇、莫扎特傳記，於是特務暗呼得咗，搵男人假扮約旦皇室貴族，愛好莫扎特歌劇之人，向女配角猛烈進攻求愛，最後得其所哉，達成收集到女配角上司嘅私隱秘密目的。
近日部份刊物猛講「陳元春」與情婦，講到似層層，睇落係有人利用上述手法，男人、女人及金錢呢類弱點，大做文章啫。既然所有程翔嘅老友都話程翔為人樸素，愛情專一，甘於捱窮，最後得到一份年薪百萬嘅職位，點會為錢而出賣佢心愛嘅祖國呀？呢，就爆單「情婦」畀你睇，散播程翔要瞞住老婆搵外快嚟養情婦，故此要收台灣錢嘅傳言；呢條橋好高、好陰濕噃，因為（一）製造夫妻不和、（二）嚇怕一班多年老友，令佢哋唔敢堅持為程翔爭取自由、（三）為間諜案提供似樣嘅動機……以普通蟻民之力，點能夠與國家機器對抗吖。
問程翔多年老友Ｌ君，問佢點睇？Ｌ君默然無語，講不出所以然，有說不出的哀痛。因為如果上述消息係假嘅，Ｌ君素來愛國，佢會為國家之不擇手段而悲泣；如果消息係真嘅，佢會為老友一哭。無論如何，散布如此傳言，已達成初步目標，就係令程翔老友唔敢多出聲。在此情況下，仍然有一班同學為佢發聲明，可敬也。