繼金屬電子交易所（8161）借進軍大陸彩票業務炒到飛起後，昨日又輪到中國蜂業（8156）話進軍大陸彩票生意，股價升幅重勁抽，最高見過1.88元，收1.48元，升102％，成交一樣好誇張，成交股數6658萬股，金額9747萬元。
經紀黃話中國蜂業同金屬電子交易所有所不同，因為金屬電子交易所有間澳洲上市公司做合作夥伴，兼且計晒條數出嚟話會賺幾多，所以先至令到一間德資證券行肯幫手批股集資，家陣玩呢隻股票嘅投資者，以芬佬同大陸客為主。
不過，中國蜂業就只係向大股東買咗間剛剛新開，話簽咗合約搞彩票生意嘅公司，性質好唔同。加上中國蜂業昨日開市已經係1.60元，然後一路回落嚟，呢種手法十足本地炒家的做法，似唔似有後着，見仁見智。
雖然經紀黃咁講，但金屬電子交易所前日勁升後，昨日就明顯有獲利盤出現，隻股跌12.44％，收1.97元，成交股數8613.4萬股，金額1.75億元。
慕容小初