飛天朱交遊廣闊，同唔少政界中人，就算係民主派都好老友，佢接受張寶華訪問時，就論盡政界好友。
喺佢眼中，馬丁係一個好有智慧同原則嘅人；達仔李永達則好有江湖性格，好有氣派；素有sound-bite王之稱嘅張文光當然係口才了得，自己想學都學唔到啦！
女將方面，卿姐同飛天朱都有偈傾㗎，飛天朱重畀卿姐話過自己唔夠勤力，做事又唔夠立場，所以佢話要向卿姐學習。
數完民主派，點可以唔講親中陣營嘅老友呢？其中飛天朱特別佩服曾鈺成，對佢嘅辯論同邏輯讚不絕口，話曾生係一個真正嘅傑出人才。唔知飛天朱眼中另一個曾生曾蔭權，又係唔係一個真正人才呢？
傳真︰2623-9278
電郵︰[email protected]