演員最怕的不是日接夜、夜接早的通告，而是夏天拍古裝，冬天拍夏裝。正在開拍古裝劇《布衣神相》的林文龍、楊怡和林峯天天同陽光玩遊戲，各有各的消暑妙法。
五月至九月是香港溫度最高、天氣最熱的時期，同時亦是拍古裝的好季節，屈指一算，無綫至少有兩至三套古裝劇在拍攝當中。其中由林文龍、楊怡和林峯主演的《布衣神相》，各人要穿厚厚的古裝之餘，更要打到飛起。
打足五日
楊怡有兩次中暑經驗，所以對避暑素有心得，她日前說：「就係最初開呢套劇嗰時，因為同時間接住另一套劇埋尾，所以唔夠瞓，又曬一曬，當時又嘔又暈，手腳無力，最後支持唔住入醫院。試過中暑，所以我特別注意解暑，平時一定要帶遮，一支結冰嘅水，一把風扇，我重試過貼退熱貼，搽驅風油，等自己涼啲，放工就梗係返屋企飲湯水，平時我都會自己煲冬瓜水消暑。」
林文龍則說：「呢套係我有史以來打得最勁嘅一套，呢套超級武俠片，公司真係睇得起我，重以為我十八廿二，一個禮拜打足五日，重係咁熱嘅天氣。一定要自備風扇、冰水，最近我屋企會準備一盆冰凍沙律畀我，隨時可以消暑解渴。」
熱熔風扇
至於林峯就不怕夏天拍古裝，不過最好是一套起兩套止，他說：「嘩，拍古裝係一個減肥最好方法，啱我，不過唔可以太多，因為會過瘦。我曾經都試過中暑，所以避暑好緊要，我就會帶定幾把強力改裝風扇傍身，試過改裝太大馬力，把風扇熔咗，所以要帶定幾把。」 採訪、攝影：楊潔雯
