楊千嬅為內地的網絡遊戲擔任廣告代言人後，今年獲得加薪續約，廣告商更邀請她為新設計的網絡遊唱主題歌，相信有助她打入內地市場。
楊千嬅今年與網易網絡遊戲續約，繼續擔任該網絡遊戲的廣告代言人，由於網易請了千嬅做代言人後生意額上升，更成為全國高銷量的網絡遊戲，該公司老闆去年底已開始與千嬅的經理人公司談續約條件，據悉今次續約她可以得到約三百萬酬金。
籌備出國語碟
千嬅早前到上海出席上海遊戲博覽會，為該產品宣傳，並表示當日的情況很難忘，她接受電話訪問時說：「嘩！嗰日真係好多人，我都冇諗過會咁墟冚，嗰日我除咗喺攤位試玩遊戲外，重出席咗佢哋嘅記者會，網易決定會出版一個遊戲，𠵱家傾緊用我唱嘅新國語歌做遊戲主題曲，公司已經開始幫我籌備國語碟，下半年我要錄一隻國語碟同一隻廣東碟。」
除了錄碟工作外，千嬅一樣會抽時間拍片和拍劇。為了開拓內地市場，其經理人公司最近就替她洽演內地劇，如果可以接拍高質素的內地劇，千嬅十分樂意演出，她表示：「其實我唔怕辛苦，如果齣劇係好嘅，我會考慮，但最終都要睇吓有冇期，如果撞期都冇辦法，但我相信如果要開拓內地市場，拍劇都係一個好方法。」
電話被偷肉痛
日前千嬅在中環出席一個朋友活動時，遺失了一部Nokia手提電話，千嬅表示：「個電話係Nokia送畀我嘅，唔見咗我都幾肉痛，因為個電話幾新款，遲吓我都要買番個。嗰晚我冇乜飲酒，我喺個袋攞個電話出嚟講，講完之後就擺咗喺枱，然後去咗洗手間，點知返嚟之後個電話就唔見咗，當時我都唔知俾邊個攞咗，第二日又要通知電訊公司，認真麻煩。」
