潮流興韓風，唐英年司長嘅千金愛聽BoA，司長都話幾好聽喎。小ＹＹ自紐約報道，以前佢在美國讀大學喜歡去唐人街租TVB劇集影帶，現在就在互聯網下載韓劇或者去買韓劇DVD，喺屋企睇餐飽。
既然韓風猛吹，不如學吓韓文，肥仔Ｋ趕潮流，喺東京修讀韓語初階，覺得進度太慢，趁暑假走咗去漢城（現稱首爾）一間大學讀暑期韓文班。大學將啲學生分做六班，第六班程度最高，第一班就係初哥，乜都唔識嘅外國人。肥仔Ｋ初讀第二班，發覺閱讀能力追唔上，於是走去讀第一班，又發覺太過淺，已經識晒，又走番上第二班，點知上咗三四堂，教師就猛咁發問，肥仔Ｋ追唔上程度，答唔到，俾教師鬧到狗血淋頭，當足佢係天下第一蠢材。肥仔Ｋ唔係唯一被鬧之人，班上廿幾人，除咗五六個日本人對答如流之外，個個都俾教師省到面懵懵，兩個女生直情喺喊到一句句。一位來自南加州大學嘅黑人學生到漢城做交換生，第一次俾先生當眾大罵，覺得好委屈，對肥仔Ｋ講：「我讀書成績唔曳，都未試過咁樣俾老師痛罵嘅。啲南韓佬點解咁粗魯，冇禮貌？我𠵱家冇晒自尊心，好想輟學。」
肥仔Ｋ喺美國讀書，教師從不罵學生蠢，到日本學日文，日本教師學足美國作風，只會話學生夠醒，學得唔錯。只有在漢城學韓文，先至日日捱罵，佢向一位舊朋友韓國博士投訴，韓國人笑笑口講：「我哋啲教練出晒名夠兇惡，大牌球星喺球場上唔聽點，一樣俾教練兜巴冚，你順便學埋韓國文化啦！加油，加油！」
肥仔Ｋ話六班學生之中，佢係唯一嘅香港人，日本人最多，其中又以日本女仔佔多數，睇嚟日本人亦吹韓風。韓國可能係亞洲國家之中，最重視地位尊卑、男人要女人聽話嘅社會，肥仔Ｋ好容易同女同學埋堆，因為佢夠香港仔——斯文喎。