金屬電子交易所（8161）配完股後復牌，昨日暴升57.34％，異常惹人注目。隻股喺短短幾個月內，由仙股升足幾十倍，真係技驚四座。
經紀黃話，隻股升幅驚人有原因，據聞有唔少基金都已經落場參與，佢哋話金屬電子交易所喺大陸搞彩票呢個古仔夠晒動聽，因此隻股累積升幅雖然大，但班芬佬仍認為高處未算高。真係信不信由你，小初自問真係唔識睇。
金屬電子交易所昨日收2.25元，成交股數4.95億股，金額6.98億元。至於阿媽寶威（024）都唔差，升6.67％，收0.56元，成交股數3646.2萬股，金額1938.5萬元。
另外，近日股價勁跌的南太電子（2633），股價勁跌之謎終於解開，原來係大股東自己減持。經紀黃話，南太電子基本因素應該冇變過，但就唔明大股東點解要喺市場沽貨，其實大股東若要沽貨嘅話，可以搵個好些少嘅配售代理幫手，由芬佬接貨會有秩序好多。
慕容小初