今年係中國抗日戰爭勝利六十周年，全國各地都有搞紀念活動，亞視新聞部特別拍咗五輯名為《三年零八個月》嘅特備節目，由呢個星期六起，每晚十點播出。噚日佢哋喺海防博物館舉行首播，重請咗好多政界人士同退役軍人以及游擊隊成員出席，現身說法。
其中一位姓馬嘅英兵，今年已經九十一歲，重好精神奕奕，佢話當年佢守住𠵱家中港城，日軍一到，打咗三日就撤回桂林，至今重食緊每月萬一蚊長糧。問佢有乜難忘事，佢話有好多，但係唔講得，因為係秘密，但係佢都爆咗自己係MI9（唔係MI5）英國戰時情報科人員嘅身份。
另一位英兵王志漢就慘好多，佢係九龍華仁仔，被日軍捉咗去深水埗集中營，佢話一世都唔會忘記日本人妄殺無辜。
八方噚日睇首播，先至發現好多前新華社嘅高層好似楊奇同陳達明原來都係港九大隊成員，當年負責保護廖承志同喬冠華等人逃離香港。
傳真︰2623-9278
電郵︰[email protected]