八方早前喺度講，政制事務局局長林D9露出狐狸尾巴，因為唔明佢點解要修改基本法附件一同附件二，除非佢想改要得立法會三分之二通過嘅條文，改成一半啦，反正政府喺立法會唔夠票。
點知噚日寃家路窄，喺一個公開場合，八方同林局長撞個正着，林局長笑八方篇文得三分二準確，因為佢只係話要改附件，冇話改三分之二嘅要求。咁又係真嘅，呢個只係一個傳聞，唔做最好。
冇需要改基本法附件
但係八方始終唔明，修改行政長官同立法會嘅產生辦法，點解要改附件？林局長就話係要改嘅，例如選舉委員會如果加到一千人，就要改附件一，因為嗰條條文寫住選委會由八百人組成。喂，但係附件一又寫明○七年之後如果要改，只要立法會三分之二通過、特首同意、報人大准就掂，幾時叫修改附件呢？
林D9叫八方返去睇吓舊年人大釋法嘅內容就明，剛好亞視主席黃保欣又同場出現，八方就向呢位前基本法起草委員兼現任基本法委員會副主任黃保欣請教。保欣叔話，佢啱啱前日由內地返港，不過，佢都認為改○七、○八嘅行政長官同立法會產生辦法以及組成，冇需要改基本法附件一同二，只要通過特區本地立法就可以。
保欣叔係當年基本法起委會政制小組嘅成員，佢都記得冇諗過將來要修改附件，林D9究竟聽邊個講嘅呢？
正如黃保欣話齋，一改開就好麻煩，因為𠵱家睇嚟，基本法唔少條文都有問題，唔通條條都改？
所以話，基本法唔可以亂咁話要改，附件都一樣，因為改親都要勞師動眾，要全國人大開大會先至改得，除非林D9講嘅修改附件同八方理解唔同，只係指去人大常委批准同備案而已。保欣叔又話佢贊成選委會加到千二或者千六人，立法會加唔加議席都冇所謂，因為加一個位要使多二百幾萬，好貴啫。
原來黃保欣剛剛同香港以及澳門基本法委員會嘅成員去黑龍江旅遊考察，佢話最近比較忙，下個星期會返老家福建出席一個紀念抗日戰爭六十周年嘅活動，保欣叔出名愛國，當然唔可以缺席。
傳真︰2623-9278
電郵︰[email protected]