港股市勢真係好雄，前日大升成300點，噚日早段「係咁意」調整一下，午後在滙控（005）帶動之下，又再升過，以接近全日高位的15445收市，升98點，期指未能跟上，收15365，低水擴大到80點，而下跌股亦比上升股為多（俱不計認股證）。
今個升浪，恒指升咗千多點，開始時由地產股帶頭，跟住輪到中移動（941），噚日更由滙控接力而上。滙控中期業績比預期為佳，但股價就落後大市好多，今次有機會做番齣好戲。
由去年11月中開始，滙控走勢形成一個大型圓底，噚日終於衝破下降軌的頸線阻力，且有大成交支持，確認開展大升浪，短線目標138元，中線更可見150元。滙控噚日收129.10元，升0.90元，成交2128萬股。
睇好一方先贏一局
滙控宣布中期業績後，有大行睇好，亦有睇淡，現時走勢突破，睇好一方先贏一局。高盛指滙控中期業績消除市場3項憂慮，包括息差收窄、融資信貸成本上升，以及收入下降，而管理層控制增長動力良好，確認其評級「優於大市」，為本港及亞洲銀行股首選，目標價146元。
一波睇得重好，指滙控信貸成本低企、存款息差擴大，業務增長強勁，特別係新興市場，維持其「優於大市」評級，目標價155元。
睇好滙控，有兩隻C輪可以考慮。一隻係3821，呢隻係末日輪，8月31日到期，噚日收31.5仙，升36%，低水0.74%，槓桿率有41倍。短線計，滙控喺未來一兩個禮拜，唔好話多，升3元，就算17日除咗息，呢隻3821都起碼值60仙，幾乎有一個開。
想博更大堆，可吼3777，呢隻係價外輪，輪價0.184元，認股價130.50元，10月6日到期，只要滙控升到貼價，3777嘅升勢就會轉急。若滙控升到上短期目標價138元，3777以平水計，都起碼值70仙，可以大升2.8倍。3777嘅槓桿率70.2倍，刀仔可以鋸大樹。
早日推介嘅生命科技（1180），噚日再升11%，收12.8仙，可以訂下止賺價繼續持有，博食大茶飯。金威集團（910）終於反彈，收13.9仙，升14.8%，成交大增，可以揸多一陣。
郭兆誠