𠵱家一下子有三份免費報紙，要睇晒都幾唔得閒，八方聽聞重會有本地報業集團加入戰團。噚日明報企業舉行股東大會，八方好自然問吓佢哋會唔會做埋一份？明企執行董事張裘昌就話，若果要做，早兩三年已經做咗。
不過，張董同意既然出得三份免費報，肯定呢個生意係有錢賺。佢話市場得一份免費報時，收費報章銷量跌咗百分之一至二；據市場調查機構講，免費報搶走咗約百分之五嘅廣告。現時三份免費報每日印差唔多一百萬份，肯定對收費報紙有影響，銷路下跌百分之三至五並唔出奇；廣告影響則暫時未見到。張董重話，咁搞法最終要睇吓邊個錢多，長遠嚟講會整固。
咁係咪傳統收費報紙冇前途？呢位行內前輩就話，免費報紙以年輕人、初級行政人員等為對象，吸納嘅廣告亦會針對呢批人，同一般傳統報紙唔同。佢又話，免費報亦可以作為一個教育渠道，培養讀者睇報紙習慣。
傳真︰2623-9278
電郵︰[email protected]