恒指又升98點，上到15445。炒輪炒得應，有魚有肉，做得唔好，朝早買貨，到收市已經唔見1成。切記克制注碼，咪淨係有買冇賣。
國壽C輪3966：國壽（2628）企定喺6.05元，兩隻9月份夠鐘嘅C輪3966與3740，則同跌8仙。國壽喺6元水平消化一陣，估計再上，相信打出宣布中期成績日期之時，芬佬會踢兩腳上去，去年派半年成績表日期係8月27日。
博國壽扯高上去，C輪博反彈，3966啱睇，壽命較3740長11日，有時發財就因為多幾日壽命。3966喺9月12日夠鐘，輪價55仙，平水，槓桿率11倍，平水唔使計有效槓桿率，咪理引伸波幅。正股升兩毫隻輪就升兩毫，啖啖肉。睇錯咗，則當然啖啖血。
中銀C輪3641：滙控（005）生猛，收129.10元，升90仙。先幾日渣打（2888）升得勁，滙控跟埋上去好應該。中銀（2388）升5仙，睇吓幾時跟埋滙控上去，係時候搵隻細價C輪炒。
成交份數最多嘅係3641，炒家炒親球球聲，總成交186球。明年11月到期，夠晒長命，輪價19.7仙，溢價4.4%，槓桿率8.3倍（有效5.3倍），引伸波幅23%。正股升幾毫，揸住隻輪，可執一兩成利錢。
章盛