中大獲李兆基基金會捐款五千萬，噚日校長劉遵義同李兆基茶敍時，兩人都春風滿面。李兆基不斷強調投資有好多種，而教育投資嘅回報率就最高，重話做生意賺嚟嘅錢可以一日就使晒，但投資教育可以令得益嘅人永世受用咁話。生意人即係生意人，捐款給大學都會諗過度過，重考慮埋回報率。
李兆基身為堂堂恒基兆業地產有限公司嘅主席，點會淨係攞五千萬出嚟呀？佢想分散投資就真，佢本人就話，先搞掂最大間嗰啲大學先，再搞其他。而佢嘅左右手林高演亦透露，佢老細除咗睇啱中大之外，重睇啱第二間學校，不過，林生死都唔肯透露邊間，話重未簽支票唔講住，但話係一間學院喎。
傳真︰2623-9278
電郵︰[email protected]