上個禮拜日，一班喺番禺同楊思琦拍緊劇集《人生馬戲團》嘅劇組人員同藝員，好似陳浩民、鍾嘉欣同唐文龍，佢哋一片苦心幫楊思琦慶祝二十七歲生日，點知樂極生悲，其間懷疑有人點錯相，結果有工作人員被毆，楊思琦同鍾嘉欣拔足狂奔後同大隊失散兩小時，但楊思琦前日接受本報記者訪問時，居然話乜都睇唔到，冇乜唔開心嘅事發生。
致電男友報平安
不過，楊思琦男友李永豪情急之下，就唔小心踢爆咗女友講大話，噚日李永豪喺電視廣播城客串劇集《窈窕熟女》，佢話：「當晚佢（指楊思琦）都有打畀我，佢都唔係好清楚發生乜嘢事，唔知係打劫定斬人，佢報平安畀我聽時，我覺得佢重有啲驚。」至於楊思琦同大隊失去聯絡，連電話都打唔通，李永豪就解釋話：「當時佢應該係同我講緊電話。」