徐子珊稍後會拍攝處女劇，心情緊張，為了減壓，日前她到又一城溜冰。徐子珊甫踏入溜冰場，大受小朋友歡迎，還主動跟她一起溜冰，玩得不亦樂乎。
徐子珊近日忙於主持無綫節目《東張西望》，稍後則會拍攝處女劇《女人唔易做》，故此她心情緊張，為了紓緩情緒，日前她獨自到九龍塘又一城溜冰。
穿上米奇老鼠圖案背心和迷彩長褲的子珊，雖只薄施脂粉，但仍被巿民認出，學溜冰的小朋友圍着觀看子珊溜冰，及後更主動拖着她一起玩，子珊亦來者不拒，更拖着小女孩轉圈，難怪小朋友大讚：「我哋覺得子珊姐姐好靚女。」
拍劇學整壽司
問子珊的溜冰心得，她說：「我讀中學時好鍾意呢種運動，每次放長假都會約同學去溜冰，好開心、好難忘。今日見到成班小朋友，佢哋其實溜得叻過我，始終小朋友大膽啲，佢哋唔怕跌，重好勇㖭！」
此外，子珊將跟鄧萃雯合作拍攝《女》劇，扮演兩姊妹，她表示跟雯女溝通過，她說：「雯女會扮我家姐，佢演技好出色，我要向雯女多多學習。
「我個角色係一個喺日本料理店打工嘅女侍應，要學整壽司，不過喺現實生活中，我只係鍾意食日本菜，都好少下廚，況且就嚟開劇，我都要節食減吓肥。」
採訪：比華利
攝影：陳偉權
髮型：AsonWong（Hair）
場地提供：又一城歡天雪地溜冰場