PSP首款中文遊戲
近排PS2喺香港引入幾款中文版遊戲,可見本地玩家亦愈來愈受到遊戲開發者重視!不過講到中文遊戲先驅代表,相信不能不提光榮《三國志》系列,除咗日文外,多代都有推出中文版,唔少人為咗深入研究呢隻Game,倒轉頭去讀番三國歷史,今個星期《三國志V》中文版更走上PSP,各位終於可以隨時隨地進入三國時代。
記者:許福合
遊戲資料
主機:PSP
類型:策略
人數:1-8人
製作廠商:光榮
售價:$340
DreamStore(25753285)
地址:灣仔東方188商場256號舖
玩《三國志》呢類策略遊戲,相信好多人同筆者一樣,玩落就好似上咗癮一樣,不論要返學定上班,都仍然掛住點樣可以搞好個城,富國強兵!今次《三國志V》PSP版就真正可讓玩家全情投入,出埋中文版更可瞓晒身去玩,難怪雖然非全新作品,仍然係好多PSP玩家指定必買之作。
讀碟速度爽快
家用版《三國志V》係PS時代作品,當時已經算係「大食」之作,不過放喺集最新科技於一身嘅PSP之上,就可將原作各種內容到功能完全移植,喜愛此遊戲玩家毋須擔心,定必可玩番原著神髓。
畫面方面其實都經過調整去遷就PSP所使用嘅16:9屏幕,尤其過場動畫同結局動畫,都經過重新製作,更能發揮PSP超強播放機能,各位玩遊戲時不妨留意去比較一下。筆者試玩前對讀碟速度相當擔心,因為即使PC或PS版,《三國志》系列都以Load得耐出名,而PSP版呢方面就明顯有改善,憑PSP超越PS機能,玩落爽快得多,尤其電腦下指令時,速度比PS快,唔使再呆等電腦動作。
介面重新設計
PS手掣同PSP完全唔同,操控略有不同,除咗用十字掣,亦可使用PSP粒「Joystick」操作,都算易上手,而由於畫面尺寸所限,自然唔能夠同電視一樣,放得落咁多指令視窗,所以PSP版就針對性咁改良視窗位置,務求令地圖與各種指令視窗不會重叠,筆者覺得設計相當唔錯,而且操控相當直接,特別適合手提機上使用,舉個例子,當處理內政時,政略地圖同指令視窗會獨立顯示,玩家好容易就可以喺下決定前,於地圖上確認各國勢力,當行軍打仗,就會換上戰場雷達地圖,能輕鬆掌握戰況去調兵遣將。
7個三國劇情
《三國志V》一向都係人頭湧湧,去到PSP上都唔失威,將會有超過500名文武官登場,同樣有玩家最愛嘅能力值,可以憑工作來累積經驗,增加特別能力。
另外,武將要提高帶兵數,亦要不斷戰鬥去「升級」,同PS版一樣,提供咗多個戰鬥陣營,讓玩家去配搭使用,當然仍保留咗筆者至愛嘅單挑模式,可以不費一兵一卒就可以勝出。PSP版由序幕嘅「黃巾之亂」,到孔明死期嘅「星落五丈原」,一共設計咗7個劇情,玩家可身兼8名君主(或者供8人玩,不過要一部機,8個人輪住打),可惜《三國志V》就並無加入PSP嘅無線網絡功能,唔能夠讓多部PSP連線對戰。