陳奕迅（Eason）和詹瑞文看似是有關連，但又似毫不相干，二人因為概念音樂會《人神鬥》而走在一起，由陌生人變成互相欣賞，原來一切源於「溝通」，亦因為他們都喜歡「吹水」，所以份外投緣。
由網上行主辦的概念音樂會《人神鬥》撮合了陳奕迅和詹瑞文，故事講述世界末日之時，Eason是唯一繼續生存的人，他身邊出現很多守護天使，詹瑞文就是其中一位代表「回憶」的天使。
怕死努力求生
「世界末日」是一個頗為嚴肅的話題，但交到Eason和詹瑞文手上，竟然變得積極又搞笑，Eason說：「我怕死，我一定唔夠膽自殺，我會去搵生機，第一時間搵嘢食，又可能搵架單車去搵人，睇吓重有冇其他人生存。」
詹瑞文亦贊成Eason的看法，他鬼馬地說：「得番我一個，個天梗係有啲嘢，所謂『天將降大任於斯人也』，係要搵個伴，唔好搵到男人，最好係女嘅，咁樣先可以繁殖，好似阿當夏娃咁。」
Eason在《人神鬥》中負責多個崗位，包括主角、監製及製作人，Eason大歎做決策人很難，選角時，Eason找了劉浩龍、范曉萱、at17等音樂界好友，但為何會選詹瑞文飾演一角？Eason說：「有人同我提議搵詹瑞文，有好多人話佢好勁，平時我最唔鍾意就係搵啲hit人，但係無端端咁多人話佢勁，好！我就想睇佢點勁，不過之後睇過佢套舞台劇《男人之苦》，真係佩服！」
從不聽流行曲
詹瑞文從不聽流行曲，更未聽過Eason的歌，為何他會答應Eason演出這個音樂會？他說：「老實講，我對香港流行曲真係冇興趣，如果唔係今次同Eason合作，我都唔會聽佢啲歌，聽咗之後，我好鍾意，感覺好自由，好有heart，我想同佢合作。」
採訪：楊潔雯
攝影：陳慧安
場地：Wildfire
