【本報訊】油麻地一間找換店昨上演退賊記，獨行賊將手槍及打劫字條放在櫃面暗示打劫。視力欠佳且無遇劫經驗的老闆娘，誤以為警察光顧反應遲緩，被賊人以普通話威嚇：「快點拿錢來！」時，她一句衝口而出的說話：「嘩，有冇搞錯！你打劫！」竟嚇得賊人落荒而逃。 記者：梁偉權
因一句衝口而出說話，力保不失的找換店老闆娘姓羅（四十九歲），在吳松街寶靈商業中心地下舖位，經營兩間小型找換店兼營滙款生意。她說十多年來從未試過遇劫，店內裝有閉路電視，經今次事件後決定加裝錄影系統。
見有槍當差人光顧
昨早上十一時許，羅婦獨自在其中一間店內看舖時，一名年約二十歲、戴鴨嘴帽、口罩及架眼鏡的蒙面男子出現，不發一言，將一柄黑色手槍及一張紙條放在櫃面，暗示打劫，奈何碰上從未有遇劫經驗的老闆娘，得出一個意想不到的結果。
「我對眼有『散光』視力唔好，睇唔到張紙寫乜，見佢有槍誤以為有差人嚟幫襯滙款。當我慢慢攞起副眼鏡想睇清楚張紙寫乜時，佢可能嫌我手腳慢，大聲用普通話喝我：『快點拿錢來！』我先知佢係嚟打劫。」羅婦對於自己的「後知後覺」亦覺失笑。
她續稱：「我當時一啲都唔驚，由於店舖從未被人打劫過，自然反應竟衝口而出：『嘩，有冇搞錯！你打劫！』個賊見我咁嘅反應，可能心虛竟然攞番把槍同張字條走咗！」羅婦坦言反應慢，在賊人逃去後先至識驚，驚魂甫定在事發近半小時後始報警。大批身穿避彈衣的警員趕至調查，惜賊人已逃去無蹤。