恒指大升近300點，淨係中移動（941）貢獻都着咗148點。窩輪市場飛沙走石，揸C輪者一夜報仇。炒C輪各師各法，有人揀強勢藍籌C輪落手，博相關藍籌再去。有人揀落後藍籌C輪埋手，博相關藍籌追落後，帶起C輪。
新世界C輪9044：新世界（017）係少數打大風而雷打不動嘅藍籌，平收10.15元，有追落後條件，搵新世界C輪炒風險比較細。名牌大行沽盤不斷，但亦有名牌睇好，例如里昂新鮮熱辣，昨日出份報告，話新世界睇12.30元，計落有兩成水位。
揀新世界C輪炒，最佳選擇係9044，明年2月初夠鐘，輪價91仙，溢價7.3%，槓桿率11.2倍（有效6.7倍），引伸波幅27%。
中電信C輪4500：中移動快速移動，單日急升2.35元，即7.3%，C輪升到八彩。中電信（728）升得3格，收3.125元。與其臨淵羨魚，睇住中移動C輪爆上去，不如博中電信由中移動帶住上，買中電信C輪，主角係上周經常推介嘅4500。
4500喺10月尾夠鐘，輪價40.5仙，溢價1.9%，槓桿率7.7倍（有效6.4倍），引伸波幅29.6%。想搏殺啲，則向3872埋手。
章盛