發展商近年除咗好大路咁起住宅之外，重出現起酒店熱潮，無論大小、位置好唔好，都嘗試去探吓路。一向冇興建或管理酒店嘅南豐，最近都諗住起番間三四星級酒店玩吓。原來佢哋同政府傾緊，修改石門塊商業地地契，轉做酒店，如果補地價傾掂數，應該都係南豐嘅第一間酒店。
呢塊地南豐喺九七年頭買入，原本諗住起寫字樓，地基都做好咗，點知碰啱金融風暴，新界寫字樓從此一沉不起。
其間南豐曾經兩三次申請改起大眾化嘅住宅，但係又得唔到城規會同意，所以拖吓拖吓，咁就拖咗八年幾。因為遲遲都唔發展，相信已經畀政府罰咗成千萬。
其實南豐一直都想起住宅，不過，諗過都幾難如願，又見香港旅遊業好景，唔夠房間供應，咪退而求其次，起間酒店囉。就算將來冇遊客，都可以用長租形式租畀人住，好過丟空塊地，蝕息兼罰錢。
電郵地址：[email protected]