本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如有任何疑問，可致電勞工處熱線：27171771查詢，此熱線會由「1823政府熱線」職員接聽。
老張：亞蒙，咁啱嘅，去開工？
亞蒙：唔係呀，單工程上個月啱啱完咗，重未有工開。
老張：咁啱嘞，我約咗良叔同明哥佢哋下個星期去澳門玩兩日，不如你都一齊嚟吖。
亞蒙：唔去嘞，冇錢呀！單工程做咗幾個月，我老細係初頭嗰兩個月準時出糧，之後一直拖住，到𠵱家重有兩個月糧未出，想搵佢又搵唔到，都唔知點算。
老張：有乜點算吖，梗係繼續搵佢啦，不過你都要通知大判喎！
亞蒙：通知大判？
可要求大判墊支
老張：乜你唔知呀！抵你叫亞蒙，蒙查查咁，等我點醒你啦，建造業嘅僱員如被直屬僱主（判頭）拖欠工資，除咗向你嘅直接僱主，即係判頭追討外，亦可以根據《僱傭條例》，要求總判商、前判次承判商或者前判指定次承判商（俗稱大判），以墊支方式代償工資，但就以欠薪期間最初兩個月為限；而大判所支付的欠薪可被視為該判頭拖欠大判的債務，大判可循民事錢債程序追討該判頭。
亞蒙：係咩，咁點樣要求大判墊支呀？
老張：法例規定，僱員要喺工資到期後60日內，以書面通知大判。為咗保障自己嘅權益，你都係快啲向你老細同大判申索，或者去勞工處勞資關係科分區辦事處問清楚，費時遲咗有損失就無謂啦。
亞蒙：咁我都快啲去問清楚先，今日遇到你，真係出門遇貴人嘞。
資料提供：勞工處勞資協商促進科
服務熱線
電話：29908288
傳真：23702192
電郵：[email protected]