會考生萬千寵愛在一身，很多人給他們鼓勵，提供出路，升學和就業指南厚厚一叠。家長四出奔波，老師忙於推薦，全城爭相替這些黃毛小子做開路明燈，將溫室的溫度調到舒舒服服的25.5，幫小花擋風擋雨擋驕陽。
其實，後生仔，挑通眼眉，比想像中早熟地，很會為自己謀福利，懂得減壓，自己開解死結，向前看。反而家長需要唞唞氣，relax一下，乖仔乖女唔該替兩個神經緊張的老餅打打氣，說些動聽話，像：
「雖然得幾分，好彩會考不是行扣分制，唔會扣晒十五分釘牌。」
「開車唔好會撞死人，會考唔好，唔會死人。」
「特首施政唔合格都照做落去，會考唔合格，唔會腳痛，冇人可以迫我落台。」
「肥佬冇壞，明年瘦身再來過。」
「鄧小平都冇會考過，一樣掂。」
「可能是廉署近來太多負面消息，影響了我的成績，拿不到1CAC。」
「香港已經太多狀元，叫做狀元樓的食肆也有幾家，無謂跟人搶飯碗。」
「個個高官會考都掂，不過，阿媽，你唔係想我做林瑞麟吖嘛！」
「四十歲，洗碗都唔請，但四十歲仍然可以再考會考。來日方長，老竇你放心啦。」