此日中午飯局，人多嘴多，討論十分熱烈，從「陳元春」養情婦、Esquire(Electronics)Ltdvs滙豐銀行案、離婚數字創新高以至猶太人割禮，都有講到，真係少啲腦筋都追唔上。賓架Ｗ博學多才，由聖經講到馬清揚買紅寶石（如何分辨真假），大家聽到寫個服字。呢啲通識學問，除咗讀書之外，亦需真實經驗，做賓架，借過錢畀珠寶商，攞鑽石寶石做抵押品，一定會學過分辨真假嘅方法，不過記得好似賓架Ｗ咁仔細嘅，少見也。
離婚案件數字創新高，每年有萬六宗，是否有利樓市呢？追數王平時追欠債追得多，對啲蠱惑招式十分熟悉，佢話：「且慢，離婚、結婚數字內含水份，不過我唔知有幾多，我哋追數，不時碰上假結婚、假離婚嘅事，無論男女，大概用十萬銀就可以搵到內地男女合作，假結婚，之後申請大陸一方來港，到港後不久就搞離婚，通常要搞三四年先至完成。本港亦有男女為咗公屋而結婚離婚。」離婚只需幾百蚊律師費，容易到極，唔怪得咁容易。
律師Ｎ就話：「冇咁少，離婚費用幾百蚊，只係食肆賣一蚊一隻雞嘅招徠方法。假如男女雙方同意離婚，唔爭家產、唔爭仔女，到律師樓講兩句就簽字，梗係收得少啦，但係有嘢爭吓，再鬧埋交，咁就複雜好多，畀我逐件收費，可以收成萬銀一單，甚或過之。」
原來樣樣嘢都唔可以只看表面，內行人會知多啲。律師Ｎ與追數王一樣，見過唔少假結婚、假離婚之事。睇多啲、讀多啲、鑽研深啲，包冇錯。賓架Ｗ叫我哋研讀Esquirevs滙豐一案，睇吓法官WilliamWaung點樣寫判詞，會受用無窮。原來賓架Ｔ已經下載咗判詞，用作教材，教銀行嘅新一輩貸款主任，如何追欠債、如何處理銀主盤。左丁山返到公司叫秘書下載判詞，一睇，幾十頁密麻麻，不知幾時先至可以消化。