PSP機主呢輪話題，肯定係升級Firmware2.0（韌體）後有乜嘢玩，其熱鬧程度比宣布推出PSP版《Winning》有過之而無不及！之前講過換壁紙等主要改良點，今日就同大家實地測試PSP上網同埋下載PortableTV！
Firmware2.0有成19項改良點，功能大強化，尤其係終於內置瀏覽器，簡直令PSP脫胎換骨！SONY今次「咁益」用家，其實基於兩大原因；除咗抗衡破解專家之非官方軟件及翻版Game下載外，另一重要戰略，就係配合日本So-net推出「PortableTV」下載服務，讓玩家免費下載38款影片欣賞（非日本So-net用戶亦可免費登記），類別由電影、音樂MV、運動、旅遊甚至卡通等。雖然暫時大部份都屬「短」片製作，不過睇到SONY對流動影片下載相當之樂觀，甚至以免費下載作宣傳，配合電影及音樂兩大支柱，大有機會發展出新一套媒體觀賞形態，谷得起嘅話，個個周街拎住部PSP下載，SONY都幾和味，SCE同So-net呢兩大部門拍住上搵大錢。
在此須提醍讀者，PortableTV節目只會直接抄落PSP上之MSDuo，若電腦未連上PSP的話，網頁將不斷搜尋而導致《IE》癱瘓，甚至出現當機！小心。
支援Java獨欠Flash
講番PSP上瀏覽器之表現；一如所料，由於欠缺TouchScreen，輸入網址較麻煩，幸好預設「 http://www」、「.com」等快捷輸入，以及對應機上Analog掣，在網頁上ClickHyperLink方便程度媲美滑鼠操作，筆者估計好快會出現對應之USB鍵盤周邊。作為PSP第一款瀏覽器，功能未算強大，如不支援Flash格式、同時只可開啟三個網頁、未有大五碼Encode（Big5）中文等，就算單一個網頁，內裏相片太多或太大的話，亦會出現記憶體不足而未能顯示等弊病，希望再升級時能以MSDuo作記憶緩衝吧。
值得慶幸係支援JaveApplet，好多如動態按鈕等網頁特效得以保留，而且瀏覽網頁順暢，透過L、R掣切換幾個網頁都可迅速顯示，比甚麼500MHz嘅PocketPC重要嚟得爽！
文：徐影龍（[email protected]）
免費登記簡易步驟
1.同意條款。
2.輸入個人資料（需真實電郵）。
3.發出申請電郵。
4.接收含登入、密碼及啟動超連結之So-net電郵。
5.啟動後便完成申請。
P-TV網址： http://www.p-tv.jp/
預告：
PSP無痛顯示中文網頁、免軟件直睇《Word》、《Excel》文件！