中學會考放榜，八方識得幾個應考嘅世姪，成績都算唔錯，佢哋嘅爸爸媽咪簡直開心到好似中咗六合彩咁，一生兒女債真係冇講錯，個仔幾條A當然好啦，萬一佢變咗做隱蔽青年，又或者自甘雙失，啲父母真係喊得一句句，畢竟好少人好似羅鷹石同羅康瑞咁識教仔。
羅鷹石係鷹君集團創辦人，佢啲仔有前醫管局主席羅嘉瑞、富豪酒店主席羅旭瑞……個個都有成就，其中一個就係羅康瑞，瑞安集團董事長，喺上海搞新天地全國聞名，最近佢贊助中國版《飛黃騰達》電視節目，鼓勵年輕人創業，八方喺新天地佢至愛嗰間茶樓，同佢飲茶，聽佢講教育。
坐船過澳洲讀書
羅康瑞話自己細個成績滿江紅，淨係鍾意踢波，志願係做二世祖，好彩佢阿爸夠惡，自己親自去學英文教佢，帶佢去次街都要佢作番篇文，十五歲就掟佢去澳洲讀書，係坐貨船去，同啲水手一齊食飯，留學六年只准回港一次，暑假要做工學賺錢。
咁多身家咁刻苦，當然係想先勞其筋骨，羅康瑞𠵱家做咗人老竇，明白阿爸苦心，今個暑假亦安排個寶貝仔去一間五星級酒店做嘢，做乜？做bellboy囉。
唔及阿爸咁嚴苛
羅康瑞其實好錫對仔女，佢當日都話自己唔似阿爸咁嚴苛，時代唔同咗，佢阿爸都係對自己個仔嚴格，對個仔個仔就完全兩樣，兩爺孫不知幾friend。今日瑞安有個活動，羅康瑞會出嚟見人，大家如果想問佢教仔心得，或者打探羅公子喺邊間酒店捱世界，記得到時問佢。
傳真︰2623-9278
電郵︰[email protected]