王菲大前日同夫婿李亞鵬成功撇甩傳媒，靜雞雞由上海空降泰國布吉慶祝生日，經本報獨家報道後，亦有其他記者陸續到訪，不過向來低調嘅王菲千方百計避記者，同記者大玩捉迷藏。
周一（八號）係王菲三十六歲正日生日，嗰晚佢同老公及朋友到布吉巴東沙灘嘅餐廳食飯慶祝，但佢專登喺入住嘅BanyanTree酒店中、專供入住頂級豪華獨立屋貴賓嘅大堂秘道離場，令記者撲空。
折返酒店歎Spa
到前晚香港時間七點，王菲夫婦又準備同朋友出街食飯，佢哋喺臨出車之前，搵酒店職員請記者行到九丈遠嘅地方，同一時間佢哋就喺大堂秘道入面嘅停車場坐車外出，直去巴東沙灘嘅餐廳食晚飯。
王菲夫婦到達巴東後，因為重未撇甩記者，王菲坐嘅車輛就駛入一個隱蔽停車場，佢啲朋友落晒車視察環境，又分別行咗去三間餐廳探路，王菲即刻趁機叫司機駛返去酒店，決定唔食飯改喺酒店歎Spa。至於王菲友人就自行喺巴東一間泰式海鮮餐廳食飯，飯後就打包外賣畀王菲夫婦享用。
