【本報訊】城門隧道出口七十多人受傷的六車連環相撞車禍中，兩名科技大學學生「適逢其會」，雖然本身亦有受傷，但由於其中一人是聖約翰救傷隊成員，兩人亦不顧自己傷勢，在救援人員到場前，協助替其他傷者作初步治理。
兩人一傷腳一爆鼻
其中二十一歲的機械工程系學生黃少斌，事發時在49X巴士下層，他當時正前往沙田返暑期工，並在車禍中撞傷右腳。黃講述意外經過時仍猶有餘悸：「貨櫃車撞埋架巴士度，成架巴士震咗兩三秒，裏面啲人都跌晒落地，啲燈閃吓閃吓，我連眼鏡都飛甩埋，重有人大叫『架車冒煙呀！火燭呀！爆炸呀！』嚇到啲乘客大嗌大叫，個個都爭先恐後衝落車，情況好混亂！我幾驚當時會發生人踩人，真係好恐怖呀！」
黃的中學兼大學同學何俊豪，剛巧坐在同一輛巴士的上層，何加入聖約翰救傷隊多年，他在意外中猛撼向前面座位，導致鼻骨爆裂。他說當時車上滿載乘客，各人一見車長打開車門便蜂擁下車，你推我撞。他在下車時才見到黃少斌，另外見一名女子倒在地上呻吟，憑着其急救經驗，相信她是鎖骨受傷，遂聯同黃少斌合力用袋墊高傷者，以紓緩其傷勢痛楚，再陪在她身邊安慰。
傷者候治一度鼓譟
另有一名沒有受傷的十三歲男童余嘉熙形容，事發時巴士上乘客大多毫無防備，當巴士被貨櫃車撞倒時，全部都如滾地葫蘆般倒在地下。
救援人員到場時，首先替大量傷者進行分流，一些傷勢較輕的乘客不滿遲遲未獲敷治，一度鼓譟。加上正在下雨，大批傷者須冒雨坐在路邊等候，頗為狼狽。其他無受傷乘客則被帶往隧道管道內避雨，再由九巴安排車輛將他們載走。
