炎炎夏日，要做街場王者，除了球技了得，一身裝備都極之重要。所以歇暑後的《波鞋Guide》第一擊，就搵咗港隊成員香振強，介紹以街場起家的And1產品；等大家齊齊喺街場showtime。
圖/文：仙道彬
效力永倫的港隊控衞香振強（阿香），自言其運球技術師承艾華遜，早年更經常對鏡模仿AI的動作，就連穿衣風格亦同樣hiphop。阿香更將這風格帶到球場之中，所以富有hiphop味道的And1，就成了他的至愛。
HotSauce系列「浮誇」搶眼
And1一向在用色和設計上都顯得誇張大膽，今次介紹的兩款HotSauce球衣亦不例外。先講落場版波衫，球衣左胸大大個MixTape繡章，加上心口的And1繡字和號碼，以及兩腰都用了類似千鳥格花紋托底，夠晒搶眼。至於波褲設計亦大同小異，成套着落球場，一定成為焦點。不過球衣份量不輕，出汗後肯定成為「負擔」。
嫌重的話，此系列亦有普通版球衣，除了有HotSauce繡章，球衣前胸更印上其肖像，白紅黃三色相間亦夠「浮誇」。至於波褲則與落場版一樣，用上雙層網面設計，夠晒通爽。
Showtime啱低調球員
講完波衫，球鞋當然不可缺少。今年And1就推出了Showtime予旗下球星拍攝MixTape時候穿着。這對Showtime設計比較簡約，可說照顧了喜歡低調的球員；而且在避震和抓地的表現都不差，價錢亦相宜，若預算不多，Showtime應是街場鞋的首選。
知多啲
And1除了是美國著名的籃球用品牌子，亦是街場的術語，意指球員入球兼博得犯規，有機會再入罰球，得到額外的一分。另外，近年因And1的花式籃球影帶MixTape大行其道，And1亦成了花式籃球的代名詞。
售賣地點：崇光百貨4/F
查詢：28338338
