人哋八十日環遊世界，詹培忠就只係用四十日。
金勞詹前日遊完南美四國回港，佢同八方講，今次同太太跟旅行團遊巴西、阿根廷、秘魯同智利，前後去咗二十日，玩就好玩，但係都幾辛苦。
老詹早前唔理中方吹雞，同煲呔爭做新的特首，當然連一百個提名票都攞唔夠，佢話，既然中央態度咁，無謂爭拗啦。言下之意，係中央幫晒煲呔，冇人有得玩。
返香港一陣，金勞詹下個星期二又同老伴坐飛機環遊世界，今次旅程需時四十日，剛好趕及回港立法會開鑼，今次會去十一個地方，包括日本、拉斯維加斯、溫哥華、多倫多、紐約、倫敦、法國、德國、瑞士、日內瓦等地，認真暢遊。
老詹好識享受人生，佢話兩個仔大晒唔跟佢去旅行，反而啲孫有時會去，今次當然冇份。既然咁啱下周一立法會開會講秘密監聽單嘢，老詹話一定出席，佢覺得煲呔唔應該咁做，因為佢唔認為有好大迫切性。
傳真︰2623-9278
電郵︰[email protected]