香港電視畫面色彩聲音極雜，惜感人處落空。有兩則政府部門調校的生活小品卻睇極聽極不厭，雋永。
「一人行一步，大家有好報」來自香灼璣先生任主席的公民教育委員會。以「大家」對「一人」，聽落比較爽；從字面看，「大家」換「人人」，即「一人行一步，人人有好報」，樣貌略勝。
另一段看了好幾年，相信是香港經濟大倒退，又兼沙士臨門，慘到絕的日子推出。少年埋怨臨打波卻天落水，滿心失望，望雨自言自語：「打波都落雨，連個天都唔幫我！」怨天怨地，鬼幫你咩？少年好運，有stand-by的少年朋友，鼓勵：「聽日一定好天！」多樂觀，願望在明天，過了今天再算。
《亂世佳人》Scarlett小姐一樣講過：「今天我不要再想這些，留給明天！」雖然自小精讀，死記：「今天功課今天做，明天還有新功課」，給自己太多壓力啦！停一停，緩一口氣，對人對事都有好處。
悲觀少年反問死黨：「你點知聽日好天？點知聽日唔落雨？」樂觀少年笑答：「願望在明天吖嘛，落雨一樣可以打波啫。」終於，雨中踢波之後躺在球場地上，打開衣衫，只嫌雨點小。
這段大概一兩分鐘生命教育的廣告，看極不厭，對小朋友、大朋友或再大朋友都同樣是一掬甘泉；每次看完心下感謝無名創意者及導演，佳品不問長短，只在乎感人至深。
廣州有「唐寧書店」，稱為讀書人的香格里拉，冇法，大陸人愛誇大。店子大概四、五千平方呎，有書有唱片，有咖啡廳，有網吧，有廁所；位於花園酒店後右側的華樂路與青龍坊交界。雖然未至台北誠品成為到台灣的其中一項理由，但確是煩亂廣州的一抹清風，愛書愛音樂者可浪蕩半天，不問外邊晴天雨天。
新近在唐寧買了一見歡喜名為《天淡雲間》一套三冊線裝雞皮紙面、宣紙內頁的記事本，每格五頁，奉小圖及幾段字；今天讀了陸游《遊山西村》，再洗記憶：「山重水復疑無路，柳暗花明又一村」。